komment ilé ?
Mwin lé byin mersi !
Kissa ou lé ?
Mwin sé Aleksand Cazal, mi lé artis 2D/3D mi travay dann film d’animation ek la pub.
Oussa oulé ?
Mi abit La Possession
Sé kwé out talen ?
An zénéral mi yèm byin tout bann trin kréatif, la pintur, la skultur etc. Tou se lamour po lar en zénéral la komans par in l’aktivité, lo désin. Po pa perd « talan » la et po kontinié èt kréatif dan mon bann projé personèl, Mwin la fé Tikal Komik, In « web comic » (bann desiné si internèt)
Depui kan ou fé sa?
Mi fé sa dopi Février 2020, minm pa in lané (la nou lé en Septembre 2020) mé lé kom si mwin la toujour fé sa. Kan mi gard lo promié zistwar mwin la publié, i wa direk lo karactèr lo personaz.
Sé kwé ou yaim la dan ?
Tikal komik i donn a mwin lokazyon eksprimé. Rakont zistwar, kass lé kui, mi yèm byin sa. Mi yèm rakont bann situasyon la vi tou lé jour, souvandéfwa kan zot i agard in zystwar Tikal Komik Zot i pé di « mwin osi mi lé komsa ! »
Lé vré !!
Mi vé osi partisip lo “démokratizaz” la lang réyoné é alimant nout kultur lokal. Mi di sa ek modesti. Mi vé war in pé plis la lang kréol utilizé osi dann bann nouvo média. Mwin la shwazi lo numérik ek bann rézo sosial zordi mi lé osi si Tibato n’a war ousa zot va ral a mwin !
Kom ou wa nou fé sa avek sat nou néna en indépenden, dousman dousman na fé avans lo bato ! Gras’ a ban moune konm ou nou koné lo travay na in sens…
Koz a nou in pe de out parkour.
Kan mwin la rant dan la vi profésyionèl, mwin té menuizié. Apré detrwa tan mwin la parti l’ILOI (Institut de l’Image de l’Ocean Indien). Laba mwin la geny profésyonaliz a mwin dann bann métié kréatif kom grafis, modeleur 3D ek in ta d’zafèr. Mwin la pass par salarié/indépandan (freelance) pandan détrwa zané. Zordi mi lé indépandan et na in ta projé mwin la anvi réalizé !
Té lé gayar sa ! Sat ou fé la, komen et oussa ou trouv linspiration po toujour fé ri a nou ?
Déza mi lé kontan mon bann zistwar i fé ri a zot ! Anfinnkont, lé pa konpliké, mi pe èt dan ninport kel situasyon, va inspir a mwin in zistwar.
Sak lé mwin évidan, sé koman raconte a li en 4 zimaz éksprésif. Bann web komik néna bonpé (vréman bonpé !), mé mon bann référans, sèt la donn a mwin envi de fé sa, sé « Sarah’s Scribbles » ek « Shen Comix » Néna osi Rodolphe Bax, in désinatèr BD réyoné/morisyin nou té travay dan lo minm local et mi pans ke war li fé son bann BD la influans mon désizyon po lans a mwin osi. Son bann konsèy si lo stil, lo bann référans lété vréman utile.
Out dernié publikasyon su Instagram lé animé, in forma
vidéo petet ?
Po linstan, mi ésèy gard lo kap. Tikal Komik dan son forma dorizine la pa enkor byin « maséré ».
I fo mi lès a li trouv son publik dousman dousman, ti pa ti pa. É wi, kom zot la vu tanzantan mi test bann forma animé.
Po ou sé kwé la kultur ?
La kultur po mwin sé listwar rakonté par bann zartis. La muzik, lo désin, la pintur, la skultur, bann jeux vidéo, film etc.Listwar skolèr lé politik et parfwa, sé in fo vérité. Bann zartis (kan zot lé indépandan) zot i poz lo rosanti lo pèp, zot fason kozé osi, zot maniyèr subit/aprési la vi.
Kossa ou yaimeré po la suit po ou mm?
Mon but sé de fé bann kréasyon original et rakont zistwar. I pé èt la BD, la fiksyon, lo jeu vidéo, lo désin animé…
Sé po sa lo kolektif TORTOR la aparèt.
Dann kolektif la, nou yèm osi koz si nout vizion la kréasyon artistik ek nout leskpérians profesyonèl. Mi propoz azot alé war in sobatkoz ke nou la fé na pwin lontan, « Le créole dans l’art à La Réunion » ézite pa donn a mwin zot lavi si lo tèm ! Sinonsa, néna in projé jeu vidéo smartphone i tard pa po démaré.
Kossa ou voudré po la réunion ?
Kestyon la i sonn kom lo kestyon ziss avan, parse ke dan tout sèt mi fé, mi esèy amont in réyonèzté, entouléka, Mon réyonèzté. Kom mwin té di pli o, bann zartis lé kom bann zistoryin, nou reflète la sosiété. Apré na in ta zafèr po di ! Mé sèt im yèmré war sé plis domoune i valoriz la lang par l’ékritur (la pa ryink zekspèr la lang kréol i dwa ékri kréol) é par la kréasyon.Mi pans i fo osi rann listwar La Rényon aksésib po demoun dan lékol par ekzanp.
Selon ou kossa i fo nou change su nout lil po mieu valoriz nout gayar ?
Tèh sa in bon kestyon… anfinnkont nou la bezwin plis konsidérasyon po nou minm, po nout Kultur. Parske si sé pa nou ki amont nout gayar ek fyièrté, kisa va fé ?
Sa nou valid’ !
Oussa i pe kontak aou ?
Zot i geny trouv a mwin si mon bann rézo sosial Tikal komik :
www.instagram.com/tikalkomik / www.facebook.com/TikalKomikSinonsa néna mon mail : Tikalkomik@gmail.com
Si nou di aou tibato.re kossa ou di ?
Kom di zot minm, in « marshé forin » po sèt i rode bann kréasyon artizanal, kulturel é arstistik lokal !
Chez Tibato.re nou yaime la muzik aou kel morso ou voudré fé apresi a nou ?
Muzik la mwin la toujour konu a li, mé kan mwin la komans geny in vré lintéré po mon langkozé. Mwin la konpri à kel pwin li lé militan. Koman zot i trouv ti son la zot ?
Pa bezwin komanté… Baster sé nout patrimoine !
Un mot po la fin ?
Riskab mwin la koz in ta, eskizé ! Antouléka mi dia zot mersi de donn a mwin ek dot artis/artizan l’okazyon eksprime a nou. Té gayar !
O kontrèr té gayar ékout aou, justeman i fo ban kréol i koz plus ! Nou lé konten avwar koz ek ou, tienbo larg pa !
